ჯანმრთელობა
იოგა ძილის წინ მათთვის, ვინც უძილობით შეშინებულია
![](https://alltime.ge/wp-content/uploads/2020/12/12-3.jpg)
მძიმე სამუშაო დღე ჩვენს სხეულზე აუცილებლად აისახება. თუ გაწუხებთ უძილობა, დღის განმავლობაში დაღლილობა და ნერვიულობა, დროა გითხრათ, თუ რა არის იოგა ძილის წინ. თანამედროვე სამყაროში ყველაფრის მოსწრება მნიშვნელოვანია, მაგრამ ამ ორომტრიალში სრულყოფილი დასვენება გვავიწყდება. არადა სასიცოცხლო ენერგიის აღდგენა ისეთივე მნიშვნელოვანია, როგორც საქმის ვადებში შესრულება.
იოგა ძილის წინ
დღეში 6-8 საათით ძილის შესაძლებლობა ყველას არ აქვს, ამასთან ყველა ერთნაირად არ იღლება. სხვადასხვა ფიზიკური და გონებრივი დატვირთვა სხვადასხვა რაოდენობით ენერგიის დახარჯვას მოითხოვს. აუცილებელი არაა სპეციალისტი იყოთ იმის დასადასტურებლად, რომ მტვირთავს უფრო მეტი ჭამა და ძილი სჭირდება, ვიდრე ოფისის თანამშრომელს. მაშინაც კი, თუ დასვენებისთვის განსხვავებული დრო გამოიყოფა, დასასვენებლად და ძალების აღსადგენად ხარისხიანად უნდა მოემზადოთ.
იოგა მოსადუნებლად და ძილისთვის მოსამზადებლად იდეალურია. მოსადუნებელი ასანები უშუალოდ ძილის წინ, ჭამიდან 3 საათის შემდეგ შეასრულეთ. ვარჯიშამდე შენობა გაანიავეთ, რადგან მნიშვნელოვან როლს ასრულებს სუნთქვითი ვარჯიშები და ამისთვის ჯანსაღი ჰაერი აუცილებელია.
სუნთქვა
სუნთქვა თანაბარი და ღრმა უნდა იყოს. ასე ორგანიზმში პროცესები რეგულირდება. ღრმად ჩაისუნთქეთ და ნელ–ნელა ამოისუნთქეთ. ასეთი ვარჯიში 1 წუთის განმავლობაში შეასრულეთ. თუ მიჩვეული არ ხართ, შეიძლება თავბრუ დაგეხვათ, დრო 30 წამამდე შეამცირეთ. სუნთქვითი ვარჯიშები სტრესთან და გაღიზიანებასთან ბრძოლაში დაგეხმარებათ.
ლოტოსის პოზა
გონებას ნეგატიური ემოციებისგან წმენდს, გონებისა და სხეულის ჰარმონიის ძებნაზე კონცენტრირდით. იატაკზე ან ხალიჩაზე დაწექით. ვარჯიში შეგიძლიათ ლოგინზე შეასრულოთ. ფეხები გადააჯვარედინეთ და ზურგი გამართეთ. თუ სწორად გამართვას ვერ ახერხებთ, კედელს მიეყრდენით. თანაბრად, ცხვირიდან ისუნთქეთ. ჩასუნთქვა და ამოსუნთქვა 4 წამი გრძელდება.
პაშჩიმოტანასანა
პაშჩიმოტანასანა ან უბრალოდ სწორი ფეხებით დახრა. დაჯექით, ფეხები სწორად გაშალეთ, ერთმანეთს მიადეთ. ნელა დაიხარეთ და ხელებით ფეხის თითის წვერებთან შეხება სცადეთ. ჩასუნთქვაზე გასწორდით და ხელები გვერდზე გაშალეთ, ხერხემალი ზემოთ გაწელეთ.
აპანასანა
ასანა ზურგის ქვედა ნაწილში დაძაბულობის შესამსუბუქებლად. ზურგზე დაწექით, ფეხები სხეულის გასწვრივ პირდაპირ გაშალეთ. ერთი ფეხი მუხლში მოხარეთ და მუცელთან მიიდეთ, ორივე ხელით საკუთარ თავს დაეხმარეთ. იგივე მეორე ფეხით გაიმეორეთ. შემდეგ ორივე ფეხი მუხლებში მოხარეთ, მუცელთან მიიდეთ, ამ პოზაში რამდენიმე წამით გაჩერდით. ნელ–ნელა ფეხები გაასწორეთ.
პეპლის პოზა
ზურგზე დაწექით, ორივე ხელი თავს ზემოთ ასწიეთ. ფეხები მუხლებში ოდნავ მოხარეთ და გვერდებზე გასწიეთ, ტერფები ერთმანეთს მიადეთ. ამ პოზაში მუხლები ერთმანეთს მიადეთ და დააშორეთ, თანაბრად სუნთქვა არ დაგავიწყდეთ.
ბალასანა
ბავშვის პოზა ზურგის კუნთების მოდუნებაში დაგეხმარებათ. მუხლებზე დაჯექით და ტანი წინ გადახარეთ. შუბლი იატაკს მიადეთ, ხელები სხეულის გასწვრივ, ხელისგულებით ზემოთ.
შავასანა
დამამთავრებელი პოზა, ცნობილი როგორც „მოკლე ძილის ასანა“. ის რთული ვარჯიშების შემდეგ ძალების აღდგენაში, ასევე სხეულის და გონების მოდუნებაში დაგეხმარებათ. ზურგზე სწორად დაწექით, ფეხები მხრების სიგანეზე გაშალეთ, ხელები გაშლილი. სუნთქვაზე კონცენტრირდით, არაფერზე იფიქროთ. თქვენი სხეულის თითოეული კუნთი იგრძენით. ამ პოზაში მინიმუმ 10 წუთით გაჩერდით. სპეციალისტები ჯანმრთელობისა და ჯანსაღი ძილისთვის ზურგზე დაძინებას გირჩევენ.
ვიმედოვნებთ, რომ ძილის წინ იოგას შესრულება დასვენებასა და მძიმე ფიქრებიდან განტვირთვაში დაგეხმარებათ. სრულყოფილი დასვენება არ დაგავიწყდეთ. მხოლოდ ასე შეძლებთ მეორე დღეს ახალი მწვერვალების დაპყრობას. ჯანმრთელად და ენერგიით სავსე იყავით.
![](https://alltime.ge/wp-content/uploads/2018/12/Alltime.png)