როგორ შევამციროთ წნევა: 6 სწრაფი მეთოდი, რომელიც ნამდვილად გამოგადგებათ

მაღალი არტერიული წნევა კლავს. ეს მეტაფორა არაა. მხოლოდ აშშ–ში ეს გულ–სისხლძარღვთა პრობლემა ყოველწლიურად ნახევარ მილიონზე მეტ ადამიანს კლავს.

რა არის მაღალი წნევა და რით არის სახიფათო

მაღალ არტერიულ წნევას ჩუმ მკვლელს უწოდებენ და ამას მიზეზები აქვს. ჰიპერტონიას ხშირად მკაფიოდ გამოხატული სიმპტომები არ აქვს, მაგრამ გულ–სისხლძარღვთა დარღვევის და ინსულტის განვითარების რისკს მნიშვნელოვნად ზრდის.

არტერიული წნევა იზომება 2 მნიშვნელობით. მაგალითად: 120/80 ან 200/140 ან 90/60. აი, რას ნიშნავს ეს რიცხვები:

• პირველი – სისტოლური წნევა. გვიჩვენებს, რამდენად ძლიერ (ვერცხლის სვეტის მილიმეტრებში) აწვება სისხლი სისხლძარღვების კედლებს გულის შეკუმშვის დროს.
• მეორე – დიასტოლური წნევა. აფიქსირებს წნევას სისხლის იმ მომენტში, როცა გული დარტყმებს შორის ისვენებს.

საერთოდ, სისხლძარღვები ელასტიურია, მაგრამ სისხლის ძლიერი ზეწოლისას შეიძლება ვერ გაუძლოს. ნებისმიერი მნიშვნელოვანი ორგანოს სისხლძარღვის გაწყვეტა სერიოზულ შედეგებს, მათ შორის სიკვდილს, იწვევს.

როდის ითვლება წნევა ძალიან მაღლად? ამაზე ერთმნიშვნელოვანი პასუხი არ არსებობს. ამერიკის გულის ასოციაციამ, ახლახანს „მაღალი წნევის“ მნიშვნელობის ზღვარი 130/80–მდე დაწია. ადრე 140/90 მაჩვენებელი ითვლებოდა.

თუ წნევა ამ დონეზე ან უფრო მაღლა გაქვს, რისკის ზონაში იმყოფებით. აუცილებელია სასწრაფო ზომები მიიღოთ.

როგორ შევამციროთ წნევა სწრაფად სახლის პირობებში

თუ თქვენთვის ჯანმრთელობა ძვირფასია, ჰიპერტონიის ჩივილით თერაპევტს მიმართეთ. არტერიული წნევის დონის, თქვენი ცხოვრების წესის და სხვა ფაქტორების გათვალისწინებით ექიმი პრევენციის და მკურნალობის ინდივიდუალურ გეგმას შეგიდგენთ და, სავარაუდოდ, დაგინიშნავთ მედიკამენტებს, რომლებიც წნევას ნორმალურ დონემდე შეამცირებს.

თუ რაიმე მიზეზით ექიმთან ჯერ ვერ მიხვედით, Alltime.ge–ს რედაქცია წნევის შემცირების რამდენიმე ეფექტურ მეთოდს გთავაზობთ. აირჩიეთ ის, რომელიც უფრო კომფორტულად გეჩვენებათ ან რამდენიმე მეთოდი კომბინაციაში გამოიყენეთ.

1. ღრმად ისუნთქეთ

როგორც კვლევა აჩვენებს, სწორი ღრმა სუნთქვა არტერიული წნევის სწრაფად შესამცირებლად ერთ–ერთი ყველაზე ეფექტური მეთოდია.

• მოდუნდით, თვალები დახუჭეთ. ასე სტრესის, ჰიპერტონიის ერთ–ერთი მიზეზის შემცირებას შეძლებთ.
• ღრმად ისუნთქეთ, 5-მდე დაითვალეთ. არა მკერდით, არამედ მუცლით შეისუნთქეთ. კონტროლისთვის მუცელზე ხელი დაიდეთ – მუცლის აწევა უნდა იგრძნოთ.
• შემდეგ ამოისუნთქეთ და კვლავ 5-მდე დაითვალეთ.

3-5 წუთის განმავლობაში ასეთი ღრმა სუნთქვა სხეულის ყველა ქსოვილში სისხლის ნაკადს გაზრდის, მათ შორის კიდურებში. ამის ხარჯზე სისხლძარღვებში წნევა შემცირდება.

ამოსუნთქვისას შეგიძლიათ სუნთქვა 8-10 წამით შეიკავოთ. აირჩიეთ ის ვარიანტი, რომელიც უფრო კომფორტულად გეჩვენებათ.

2. ცხელი აბაზანა მიიღეთ

დაახლოებით 45°C ტემპერატურის წყალში ხელები და ფეხები 10 წუთით ჩააწყვეთ. ცხელი წყალი კიდურების სისხლძარღვებს გააფართოებს, სისხლის ნაკადის ზრდას არტერიული წნევის შემცირებას აიძულებს.

3. ცივ წყალში ჩაწექით

მხრებამდე 32 გრადუს წყალში ჩაწექით. სხეული გაგრილდება, ორგანიზმში გულისცემა და წნევა 11-12%–ით შემცირდება. ცივ წყალში მხოლოდ ხელების ჩაყოფა ეფექტს არ იძლევა.

4. თბილი პიტნიანი ჩაი დალიეთ

მწიკვი პიტნის ფოთლებს ცხელი წყალი დაასხით და 10 წუთით გააჩერეთ. ჩაი ნელი ყლუპებით დალიეთ. ასეთი სახით პიტნა არტერიული წნევის შემცირებაში დაგეხმარებათ.

5. ვაშლის ძმრის კომპრესი გაიკეთეთ ან ძმრიანი წყალი დალიეთ

3-9% სუფრის ძმარში მარლა დაასველეთ და ტერფებზე 10-15 წუთით დაიფინეთ. ეს პოპულარული ხალხური მეთოდია. მართალია მისი ეფექტი დადასტურებული არაა (მეცნიერებს უბრალოდ არ სჯერათ, რომ კომპრესს წნევის შემცირება შეუძლია), თუმცა ზოგჯერ ძმარი ნამდვილად გვშველის.

დადგენილია, რომ ვაშლის ძმარი შეიცავს ნივთიერებას, რომელიც შიგნით მიღებისას წნევას ამცირებს (როგორც მინიმუმ, თაგვებზე მოქმედებს). კვლევა დასრულებული არაა, მაგრამ პერსპექტივები ნამდვილად აქვს.

თუ წნევის შესამცირებლად ვაშლის ძმრის გამოყენება გსურთ, მეცნიერეული კუთხით მისი შიგნით მიღება უფრო ეფექტურია. მაგალითად, 1 ჩ/კ სითხე 1 ჭიქა წყალს დაუმატეთ.

როგორც წესი, ასე სუფრის ძმარი უსაფრთხოა (როგორც სალათებზე საკაზმის სახით). გაითვალისწინეთ, რომ ამ მეთოდზე უარი უნდა თქვათ, თუ მიღების შემდეგ კბილების ტკივილი, გულძმარვა, ღებინება ან კუჭის აშლილობა გაწუხებთ.

6. კატაბალახა მიიღეთ

ან მასზე დაფუძნებული მედიკამენტი, მაგალითად, კორვაროლი. კატაბალახა ძლიერი დამამშვიდებელი საშუალებაა, რომელიც ორგანიზმს სტრესთან ბრძოლაში ეხმარება. გული დამშვიდდება, არტერიული წნევა შემცირდება. მნიშვნელოვანია: დოზას არ გადააჭარბოთ, ინსტრუქცია დაიცავით!

როგორ შევამციროთ არტერიული წნევა მედიკამენტების გარეშე დიდი ხნით

კიდევ ერთხელ შეგახსენებთ: ზემოთ მოცემული მეთოდები სახლის პირობებში წნევის შესამცირებლად გადაუდებელი ზომებია. „ჩუმ მკვლელს“ მხოლოდ ექიმის დახმარებით უნდა ებრძოლოთ, მისი რეკომენდაციები მკაცრად უნდა დაიცვათ.

თქვენთვის კარგი ამბავი გვაქვს. არტერიული წნევის დონეზე ცხოვრების წესი დიდ გავლენას ახდენს. საკმარისია, ცხოვრება ჯანმრთელი მხარისკენ შეცვალოთ, რომ ჰიპერტონია ან სრულად გაქრება ან მედიკამენტების მიღება ნაკლებად დაგჭირდებათ.

კვლევითი ორგანიზაციის Mayo Clinic–ის ავტორიტეტულმა ექსპერტებმა სია შეადგინეს:

1. ჭარბი წონა მოიშორეთ. ყოველი დაკარგული კილოგრამი თქვენს წნევას ზუსტად 1 პუნქტით შეამცირებს.
2. რეგულარულად ივარჯიშეთ. უპირატესობა მიანიჭეთ აეროვარჯიშებს: დიდხანს სეირნობა, ძუნძულით სირბილი, ველოსიპედის ტარება, ცურვა, ცეკვა. ამ საქმეს დღეში მინიმუმ 30 წუთი დაუთმეთ. ამ შემთხვევაში წნევის შემცირებას 5-8 პუნქტით შეძლებთ.
3. ჯანსაღი საკვები მიირთვით. მეტი ხილი, ბოსტნეული, მარცვლეული (ფაფა), ნაკლები ცხიმი, ნახევარფაბრიკატები, ცომეული. დიეტის გადახედვით არტერიული წნევის დონეს 11 პუნქტით შეამცირებთ.
4. მარილის რაოდენობა შეამცირეთ. ცოტათი მაინც. ასე წნევას 5-6 პუნქტით შეამცირებთ. გახსოვდეთ:  ჯანდაცვის მსოფლიო ორგანიზაცია და სხვა ავტორიტეტული წყაროები გირჩევენ, რომ დღეში მაქსიმუმ 1500-2300 მგ მარილი (1 ჩ/კ–ზე ნაკლები) მიიღოთ.
5. ალკოჰოლი შეამცირეთ. დაშვებულია დღეში მხოლოდ 1 ჭიქა სასმელი ქალებისთვის ან 2 ჭიქა კაცებისთვის. ერთი სასმელი 350 მლ ლუდს ან 150 მლ ღვინოს უდრის. დოზას არ გადააჭარბოთ და წნევა კიდევ 4 პუნქტით შემცირდება.
6. მოწევას თავი დაანებეთ. თითოეული სიგარეტი ცოტა არტერიულ წნევას გმატებთ.
7. ნაკლები ყავა დალიეთ. მოკლედ, ეს სადავო საკითხია, რადგან მეცნიერები ჯერ კიდევ სწავლობენ წნევის დონეზე ყავის გავლენას. საქმე იმაშია, რომ ზოგიერთ ადამიანში კოფეინი წნევის ზრდას იწვევს, ზოგან მსგავსი ეფექტი არ შეინიშნება. თუ პირველ კატეგორიას მიეკუთვნებით, სასმელზე უარი თქვით. (შეამოწმეთ: წნევა ყავის დალევამდე და დალევიდან 30 წუთის შემდეგ გაიზომეთ და მაჩვენებლები შეადარეთ).
8. სტრესი შეამცირეთ. ქრონიკული სტრესი მაღალი წნევის ერთ–ერთი მთავარი გამომწვევი ფაქტორია.
9. წნევა სახლში აკონტროლეთ და ექიმთან კონსულტანცია რეგულარულად გაიარეთ. სახლის მონიტორინგი დაგეხმარებათ უკეთ გაიგოთ, თუ რომელი ცხოვრების წესის შეცვლა მუშაობს უკეთ და რომელი ნაკლებად ეფექტურია.
10. ნათესავებს და მეგობრებს მხარდაჭერისთვის მიმართეთ. თქვენს პრობლემაზე უამბეთ და დახმარება სთხოვეთ. ახლობლების ზრუნვით ბრძოლა გაგიმარტივდებათ და სტრესს შეამცირებთ.