საპონი, ძმარი, მდოგვი და სოდა: წარმატებული ალტერნატივა ჭურჭლის გასარეცხად

სოდა, ძმარი და ლიმონმჟავა ყველა დიასახლისს სახლში უნდა ჰქონდეს. ეს საშუალებები ძირითად ფუნქციებს შესანიშნავად უმკლავდება. გარდა ამისა, ჭურჭლის გასარეცხად შეგიძლიათ გამოიყენოთ. თუ თანამედროვე საყოფაცხოვრებო ქიმიის ალტერნატივას ეძებთ, მაშინ აუცილებლად სცადეთ.

სოდა ჭურჭლის სარეცხი საშუალების შესანიშნავი ალტერნატივაა. ნაქაფს, ნამწვს და ძველ ლაქებს იდეალურად აშორებს. სოდა ცხიმიანი დიდი ქვაბის, ასევე ვახშმის შემდეგ თეფშების გაწმენდაში დაგეხმარებათ. სოდა მარტივი გამოსაყენებელია.

ჭურჭლის სარეცხად ძალიან ცოტა სოდა დაგჭირდებათ. საკმარისია, რომ 1 ს/კ სოდა 1 ლ წყალში გახსნათ და ამაში ჭურჭელი გარეცხოთ. ნაქაფის მოსაშორებლად სოდა ქვაბში ან ჩაიდანში ჩაყარეთ. თუ სოდა არ გაქვთ, ცომის გამაფხვიერებლით ჩაანაცვლეთ.

გაითვალისწინეთ, სოდა ყველა ზედაპირის საწმენდად შესაფერისი არაა. მინა, გლუვი ზედაპირი, ხე, კერამიკა, მარმარილო, ვერცხლი და ოქრო ადვილად შეიძლება დაზიანდეს. სოდა საკმაოდ აბრაზიულია. სოდა დელიკატურ ზედაპირებზე არ გამოიყენოთ.

ლიმონი ან ლიმონმჟავა ჭურჭლის და სამზარეულოს საწმენდად გამოგადგებათ. ლიმონი სოდის ჩამქრობის როლს ასრულებს. მაგალითად, სერიოზული დაბინძურების მოსაშორებლად ზედაპირს ჯერ სოდა მოაყარეთ, შემდეგ ლიმონის ნაჭერი გადაუსვით, რომ აშიშინდეს.

ლიმონმჟავის ფხვნილი ნაქაფის მოსაშორებლად გამოიყენეთ. ჩაიდანს 2 კოვზი მჟავა და წყალი დაუმატეთ და აადუღეთ. ამავე პრინციპით დანა–ჩანგალი გაწმინდეთ. ფხვნილი თბილ წყალს დაუმატეთ, გახსნას დაელოდეთ და გაწმინდეთ.

ბიუჯეტური ვარიანტი

ზოგჯერ სოდის ან ლიმონმჟავის ჭურჭლის სარეცხ საშუალებად გამოყენება საკმაოდ ძვირი ჯდება. ბევრი ჭურჭელი დიდი რაოდენობით წყლის და სარეცხი საშუალების დახარჯვას მოითხოვს. თუ უფრო ბიუჯეტურ ვარიანტს ეძებთ, სარეცხი საპონი გამოიყენეთ.

სარეცხი საპონი ჭურჭლის სარეცხ ღრუბელს შეგიძლიათ წაუსვათ. ერთი საპონი დიდხანს გეყოფათ. სერიოზული ჭუჭყის მოსაშორებლად გახეხილი საპონი წყალში გახსენით. მეთოდი საკმაოდ ეფექტურია.

საყოფაცხოვრებო ქიმიის ალტერნატივად ძმარი და მდოგვიც გამოგადგებათ. ძველ ცხიმიან ლაქებს იდეალურად აშორებს. მდოგვის ფხვნილი ჭუჭყს მოაყარეთ, ცოტა ხნით გააჩერეთ და ნარჩენები მოაშორეთ. რამდენიმე კოვზი ძმარი თბილ წყალს დაუმატეთ და ჭურჭელი გარეცხეთ.

გიზიარებთ უნივერსალური საწმენდი საშუალების რეცეპტს, რომელიც სააბაზანოს ან სამზარეულოს საწმენდად შეგიძლიათ გამოიყენოთ. 400 მლ თბილ წყალს დაუმატეთ 100 გ სარეცხი საპნის ფანტელები, 50 გ სოდა, 1 ს/კ ნიშადურის სპირტი და 2 ს/კ წყალბადის ზეჟანგი. კარგად აურიეთ და ჭუჭყიან ზედაპირს წაუსვით. არ დაგავიწყდეთ, რომ ხელთათმანი გაიკეთოთ და ოთახი გაანიავოთ.