კვება და 3 ვარჯიში. როგორ დაიკლოთ წონაში 40 წლის შემდეგ

40 წლის შემდეგ ქალი ხშირად ინტერესდება, როგორ დაიკლოს წონაში, როგორ დაიბრუნოს ძველი ფორმები სწრაფად და ზედმეტი ძალისხმევის გარეშე. გაგაცნობთ სპეციალურ ტანვარჯიშს, რომელსაც მთელ მსოფლიოში მიმდევრები ჰყავს. ტანვარჯიშის დახმარებით ორგანიზმს ჟანგბადით გაამდიდრებთ და პრობლემურ ადგილებს მოიშორებთ.

Аlltime.ge–ს რედაქცია გიზიარებთ სუნთქვის ვარჯიშებს, რომელსაც ბოდიფლექსი ეწოდება. ყოველდღე 3 ვარჯიში შეასრულეთ და უკვე ერთ–ორ თვეში ზედმეტ კილოგრამებს მოიშორებთ. ბონუსად, ენერგიით აივსებით. გიზიარებთ რჩევებს, როგორ იკვებოთ სწორად 40 წლის შემდეგ.

ბოდიფლექსის ვარჯიშები ნებისმიერი ასაკის, სქესის და ფიზიკური მომზადების დონის ადამიანს შეუძლია შეასრულოს. სასარგებლოა ქალებისთვის, რომელთაც ასაკობრივი ცვლილებები დაეწყოთ. ბოდიფლექსის ძირითადი ვარჯიშები 40 წლის ყველა ქალმა უნდა ისწავლოს. სწრაფი და მარტივი ვარჯიშით სხეულს დაჭიმავთ, ახალგაზრდობას შეინარჩუნებთ და ენერგიით აივსებით. დიდ დროს არ წაგართმევთ, სახლშიც შეგიძლიათ ივარჯიშოთ, სპეციალური აქსესუარების გამოყენება საჭირო არაა. დღეში 15-20 წუთი თავისუფალი დრო და სურვილი, რომ ჯანმრთელი, ხალისიანი და მოხდენილი გახდეთ, საკმარისია.

3 ვარჯიში ჯანმრთელობისა და სილამაზის მხარდასაჭერად

გაიცანით 3 ვარჯიში სახლში ეფექტურად სავარჯიშოდ. მისი ათვისება დიდ სირთულეს არ წარმოადგენს.

ხახვის პოზა

ამ ვარჯიშით ხერხემალს მოქნილობას დაუბრუნებთ და ახალგაზრდობას შეინარჩუნებთ. ვარჯიში ზურგის ტვინის მუშაობას აუმჯობესებს, ენდოკრინულ ჯირკვლებზე სასარგებლოდ მოქმედებს, მენჯის და მუცლის ღრუს ორგანოების დაავადებების განკურნებაში გეხმარებათ.

1. საწყისი პოზა: მუცელზე დაწოლილი, ფეხები შეერთებული, ხელები ტანის გასწვრივ. ხელისგულებით იატაკს დააწექით, ნიკაპით იატაკს დაეყრდენით.
2. ჩაისუნთქეთ და ღრმად ამოისუნთქეთ. ფეხები გაშალეთ და მუხლებში მოხარეთ. ხელები კოჭებს შემოხვიეთ.
3. ამოისუნთქეთ და სუნთქვა შეიკავეთ.
4. ფეხების გაშლა დაიწყეთ, გულმკერდი და თავი იატაკიდან აწიეთ. წელში სათანადოდ მოიხარეთ, თავი უკან გადახარეთ, თეძოები იატაკს მოაშორეთ. რვამდე დაითვალეთ. სურვილის შემთხვევაში, წინ–უკან შეგიძლიათ იქანაოთ.
5. მოდუნდით და საწყის პოზას დაუბრუნდით.

თავიდან მხოლოდ ერთხელ შეასრულეთ, თანდათან სამამდე გაზარდეთ.

პოზა „კრენდელი“

ამ ვარჯიშით ერთდროულად რამდენიმე პრობლემურ ზონას შეუტევთ. თეძოებსა და წელის მიდამოში ცხიმს მოკლე დროში მოიშორებთ.

1. იატაკზე დაჯექით, ფეხები მუხლებში მოხარეთ. მარცხენა ფეხი მარჯვენას გადაადეთ. მარჯვენა ფეხი გამართეთ. მარცხენა ხელით ზურგის უკან იატაკს დაეყრდენით. მარჯვენა ხელი მარცხენა ფეხის მუხლზე დაიდეთ.
2. ამოისუნთქეთ, მუცელი დაჭიმეთ და სუნთქვა რამდენიმე წამით შეიკავეთ.
3. მარჯვენა ხელის დახმარებით მარცხენა ფეხის მუხლი ზემოთ და თქვენკენ რაც შეიძლება ახლოს მიწიეთ.
4. მთელი ტანით ნელ–ნელა მარცხნივ მიტრიალდით, ოდნავ უკან გაიხედეთ. ამ პოზაში 8-10 წამი გაჩერდით.
5. მოდუნდით და საწყის პოზას დაუბრუნდით.

იგივე ვარჯიში საპირისპირო მხარეს შეასრულეთ. თითოეულ მხარეს ვარჯიში 3-ჯერ გაიმეორეთ. თუ ვარჯიშს სწორად შეასრულებთ, თეძოების და მუცლის კუნთები ნელა და სასიამოვნოდ დაიჭიმება.

ვარჯიში „მაკრატელი“

ამ ვარჯიშით მუცლის პრესის კუნთებს დაჭიმავთ, ასევე ჭიპის მიდამოში „მაშველ რგოლს“ მოიშორებთ. გარდა ამისა, სისხლის მიმოქცევის სისტემა მოწესრიგდება, კუნთები გაძლიერდება, ზედმეტი ცხიმი დაიწვება, ზოგადი განწყობაც ამაღლდება.

1. ზურგზე დაწექით, ფეხები ერთმანეთს მაქსიმალურად მიადეთ და გაშალეთ.
2. ხელები დუნდულების ქვეშ, ხელისგულებით ქვემოთ დაიდეთ. თავი და წელი იატაკს მიადეთ. სუნთქვა შეიკავეთ, გამართული ფეხები იატაკიდან 10-15 სმ სიმაღლეზე აწიეთ.
3. ამ პოზაში ფეხებით ინტენსიური და ფართო ქნევა დაიწყეთ. გახსოვდეთ, ვარჯიშისას თავი და წელი იატაკზე მიბჯენილი უნდა იყოს.
4. ათამდე დაითვალეთ. მოდუნდით და ფეხები დაუშვით. ვარჯიში 3–ჯერ გაიმეორეთ.

ვარჯიშის წყალობით ბრტყელ მუცელს მიიღებთ, გულის და სისხლძარღვების, ასევე საჭმლის მომნელებელი ორგანოების მუშაობას გააუმჯობესებთ. მეტეორიზმს, მუცლის ბუყბუყს და ქოშინს დაივიწყებთ. ვარჯიშის რეგულარული შესრულებით მენჯის ღრუს ორგანოების მუშაობას მოაწესრიგებთ.

წონის დაკლება 40 წლის შემდეგ

20, 25 ან 30 წლისას სურვილის და ნებისყოფის გამოყენებით წონის დაკლება ძალიან მარტივია. ერთი კვირა დიეტაზე ყოფნა საკმარისია, რომ ზედმეტი კილოგრამები მოიშოროთ. ასაკის მატებასთან ერთად 2 კილოგრამის მოშორებაც საგმირო საქმეა. 40 წლის შემდეგ ქალს წონის მატება ახასიათებს, თუნდაც რაციონი ან ცხოვრების წესი არ შეცვალოს. დიეტოლოგები გიზიარებთ 3 რეკომენდაციას, რომლის რეგულარულად დაცვას გირჩევთ.

ცილოვანი საკვები

კვლევებით დადასტურებულია, რომ შუახნის ქალისთვის წონის დასაკლებად ცილები სასარგებლოა. ექსპერიმენტის დროს, 4 თვე ქალები ცილებით მდიდარ საკვებს მიირთმევდნენ და ცხიმის რაოდენობა 30%–ით შემცირდა. დიეტური ცილები, როგორიცაა ქათამი, თევზი, ძროხის ხორცი, ტოფუ, კვერცხი, პარკოსანი, ხაჭო, მაწონი, ნივთიერებათა ცვლას აჩქარებს და გვანაყრებს. წონაში იკლებთ და შიმშილის გრძნობა არ გაწუხებთ. საუზმეზე ომლეტი მიირთვით, შუადღეზე მაწვნით ან ხაჭოთი წაიხემსეთ, სადილზე სალათი და თევზი მიირთვით, ხოლო ვახშამზე – პარკოსანი.

კალციუმით მდიდარი საკვები

კალციუმით მდიდარი საკვები წონის დაკლებაში, ასევე ასაკობრივი დაავადების, ოსტეოპოროზის პრევენციაში დაგეხმარებათ. კალციუმი ძვლების აღდგენას მხარს უჭერს, მისი რღვევის რისკს ამცირებს. ეს მენოპაუზის დროს განსაკუთრებით მნიშვნელოვანია. მენოპაუზის დროს ესტროგენის შემცირება კალციუმის ათვისებას ანელებს. ზრდასრულმა ადამიანმა დღეში 1000 მგ კალციუმი უნდა მიღოს. დაახლოებით ამდენ კალციუმს 800 მლ კეფირი და 100 გ ხმელი ყველი შეიცავს. კალციუმით მდიდარია თევზი, ზღვის პროდუქტები, პარკოსანი, კაკალი, სეზამი და მზესუმზირის თესლი.

უჯრედისი და ცოტა შაქარი

ნებისმიერ შემთხვევაში, ორგანიზმს ნახშირწყლები სჭირდება. მხოლოდ მისი წყარო სწორად უნდა შეარჩიოთ. ნახშირწყლები უჯრედისით მდიდარი საკვებიდან მიიღეთ. ასეთია მარცვლეული, ბოსტნეული და ხილი. უჯრედისი მავნე ქოლესტერინის დონეს ამცირებს, გულისა და სისხლძარღვების დაავადებებისგან გვიცავს, წონას აკონტროლებს.

40 წლის შემდეგ შეამცირეთ გადამუშავებული საკვების მიღება. ასეთია გაზიანი ტკბილი სასმელი, თეთრი პური, ცომეული, გაპრიალებული ბრინჯი. ასეთი საკვების ხშირი მიღება მე–2 ტიპის დიაბეტის განვითარების რისკს ზრდის.