მოხუცმა დედამ ქალიშვილის ცხოვრება გაუცნობიერებლად კინაღამ გაანადგურა

სხეულის დაბერებას ბევრი უსიამოვნო მომენტი მოსდევს, როგორიცაა სისუსტე, ტკივილი, ქრონიკული დაავადებები. ამ ფაქტორებს არაჯანსაღი ცხოვრების წესი უფრო ამძაფრებს. იცით, რომ სულის სიბერე უფრო უსიამოვნოა. ამ დროს არა მხოლოდ ადამიანი, არამედ მისი ახლობლებიც ზარალდებიან.

სამწუხაროდ, სულის სიბერის ნიშნები შეუმჩნევლად გვეპარება. აპათია, გულგრილობა, მუდმივი უკმაყოფილება ხასიათის ჩვეულ ნიშნებად აღიქმება. არადა მათში უფრო ღრმა პრობლემა შეიძლება იმალებოდეს. დროთა განმავლობაში სიტუაცია მწვავდება და ადამიანი განდეგილი ხდება. გიზიარებთ ცხოვრებისეულ მაგალითს.

ქალბატონი ანა პატივსაცემი მასწავლებელია, რომელიც წლებია სკოლაში მხატვრულ ლიტერატურას ასწავლის. ბავშვებთან ურთიერთობა უყვარს. სასკოლო ცხოვრებაში აქტიურად ჩართულია. მოსწავლეებს მუდმივად ახალ და ახალ ინფორმაციას აწვდის, ძალდატანების და კონტროლის გარეშე გაკვეთილის ახსნას ცდილობს.

ასე იყო ადრე. ბოლო რამდენიმე წელია ქალბატონი ანა შეიცვალა. ენთუზიაზმი გაქრა. სამსახურში უხალისოდ დადის. გაკვეთილს ატარებს პრინციპით, „თქვენ წაიკითხეთ, ჩემი საქმე მაქვს“. მისი ცხოვრება არ შეცვლილა. განქორწინებულია, ორი ქალიშვილი ჰყავს, პედაგოგია.  კოლეგები სიტუაციის გარკვევას და დახმარებას ცდილობდნენ, მაგრამ ანა დიალოგზე არ მოდის. თუ ლაპარაკობს, ჩივილის და წუწუნის გარდა არაფერს ამბობს.

პირველად უფროსი ქალიშვილი ნინო დაეჭვდა, რომ დედა კარგად არ იყო. სტუმრად წასვლა და ამბის გარკვევა გადაწყვიტა. მარტო ცხოვრობდა და მეტი დრო ჰქონდა დედისთვის მიეხედა. ტორტი და სხვა წვრილმანი იყიდა და დედას ესტუმრა. გულწრფელად სურდა, დედას დახმარებოდა. გადაწყვიტა, მისი ყველა თხოვნა შეესრულებინა. 50 წლის ქალს შეიძლება შინაგანი კრიზისი ჰქონდეს. მას ახლა მხარდაჭერა და შვილების სიყვარული სჭირდება.

დედასთან საუბარმა გული დაუმძიმა. საწუწუნო არ გამოელია. სამსახურში ბავშვებიც და კოლეგებიც აღიზიანებდა. სოფელში ბევრი საქმე ჰქონდა. ცხოვრება მოსაწყენი გახდა. მისი არავის ესმის. ქალაქის მეორე ბოლოში საქმეზე უნდა წავიდეს. ასე უსასრულოდ.

ნინომ მისი თხოვნის შესრულება დაიწყო. ჯერ შვებულება აიღო და აგარაკს მიხედა. ორი დაქირავებული მუშის ხელშეწყობით ნაკვეთი მოასუფთავა, სარეველებისგან გაწმინდა. მუშებს საკუთარი ჯიბიდან გადაუხადა. დედამ მადლობის ნაცვლად უსაყვედურა, რომ ორი მუშა დაიქირავა და არა ერთი.

თითქმის მთელი თვე დედის დავალებებს ასრულებდა, ქალაქის ერთი ბოლოდან მეორეში დადიოდა. და მაინც მხოლოდ საყვედურს იღებდა. მალე ახალგაზრდა ქალი გაღიზიანებული და ნერვიული გახდა, დაღლილობა გარეგნულად დაეტყო. კატაც აღარ ეკარებოდა. ამბობენ, რომ ცხოველი ადამიანის შინაგან უსიამოვნებას პირველი გრძნობს.

ამასობაში ფული გამოელია, არადა დედას სახლში შპალერის გამოცვლა სურდა. ფულის სასესხებლად უმცროს დას სალომეს დაურეკა. აუხსნა, რომ დედის ბინაში შპალერის გამოსაცვლელად რამდენიმე დღით ფულის სესხება სჭირდებოდა. სალომეს დის თხოვნა გაუკვირდა, თუმცა ხმაში ეტყობოდა, რომ არ ხუმრობდა.

სალომე ადრე გათხოვდა. ახლა ორი პატარა შვილი და ძლიერი ოჯახი ჰყავს. თავდაჯერებულობა არასდროს აკლდა. ყოველთვის წინ შეუპოვრად მიიწევდა. ალბათ, ხასიათით მამას ჰგავს. მასსავით ეგოისტია. ზუსტად ამ მიზეზით დედ–მამა ერთმანეთს დაშორდა.

დას დახმარებას დაჰპირდა. თავად დედასთან მისვლა და სიტუაციის გარკვევა გადაწყვიტა. რა საჭიროა შპალერის გამოცვლა? დედას საყვარელი ადამიანი ჰყავს? ეს კარგი ამბავია. უნდა გაარკვიოს, ვინ გახდება მისი და მისი დის მამინაცვალი. ვინმე თაღლითი ხომ არაა?

დედა და და ჩაბნელებულ ბინაში ისხდნენ. სალომეს ჩაცვენილი და უსიცოცხლო თვალებით უყურებდნენ. დედამ პირველმა დაარღვია სიჩუმე. უმცროს ქალიშვილს უსაყვედურა, რომ ისე ხშირად არ სტუმრობდა და ეხმარებოდა, როგორც ნინო, რომ აღარ უყვარდა. მალე ნინოც ჩაერთო. იმავეს ამბობდა, მხოლოდ დაამატა, რომ როგორც უმცროსს ქალიშვილს ოჯახის მიმართ მეტი ვალდებულება აქვს. კარგია, რომ ახლა მაინც მოვიდა და შეუძლია საქმეს მიხედოს.

სალომე ჩუმად უსმენდა, შემდეგ ფანჯარასთან მივიდა, ფარდა გადაწია, მტვრიან ოთახში მზის სინათლე შემოუშვა. ჯიბიდან ფული ამოიღო, მაგრამ ისევ ჩაიდო.

„ძვირფასო დაო, შპალერის გამოცვლა საჭირო არაა. ხელის შევლება საკმარისია, რომ ლამაზი გამოჩნდეს. რა საჭიროა ზედმეტი ხარჯი. რატომ გამოიყურები ასე საშინლად? ვის მოეწონები ასეთი მოუწესრიგებელი? ძალიან გთხოვ, თავს მიხედე. ორი დისშვილი გყავს. მეც მინდა დეიდა გავხდე. კარგი?“

„დედა, რას ჰგავს აქაურობა? მთელი ბინა ნაგვით სავსეა. დრო არ გაქვს, რომ დაალაგო? თუ დრო გაქვს, რატომ არ იყენებ? ნინოს საკუთარი ცხოვრება აქვს. შპალერის შეცვლა არაფერს შეცვლის. რა ახალი ამბავი გაქვს? ის რომ კოლეგები და ბავშვები მოგბეზრდა? თუ ასეა შვილიშვილები მოინახულე. პატარები შეიძლება ძველი გრძნობის გაღვიძებაში დაგეხმაროს. ეს უკეთესია, ვიდრე სახლში ყოფნა და წუწუნი. არაფერი მოგწონთ, არაფერი გაკმაყოფილებთ. გამოდის, ბევრი დრო გაქვთ და დარდობთ. ნინო კი ტრიალებს ციბრუტივით. ნინო, შენს სახლშიც ამდენი მტვერია? ჯერ შენს ცხოვრებას მიხედე“.

თქვა და კარი გაიხურა. ნინომ დედას გადახედა, ნივთები ჩაალაგა და ისიც წავიდა. მისი საყვარელი კატა ხომ მშიერია. დედას მისი შეჩერება სურდა, მაგრამ არაფერი თქვა. იცოდა, რომ ვეღარ გააჩერებდა.

მარტო დარჩენილმა ანამ ბინა მოათვალიერა. აქ ნამდვილად მტვრის სქელი ფენა იდო. სარეცხიც დაგროვდა. უნდა მოწესრიგდეს და სკოლაში წავიდეს. შვილებმა თავის ცხოვრებას უნდა მიხედონ, მას მოსწავლეები ჰყავს. რა მოუვიდა? ალბათ, ასაკობრივი კრიზისია. ნინოს ბოდიშს აუცილებლად მოუხდის.