პენსიონერმა მწვრთნელმა რამდენიმე კლასიკური ვარჯიში მასწავლა

ალბათ, ერთხელ მაინც დაფიქრებულხართ, როგორ დაიწყოთ ვარჯიში. რა თქმა უნდა, ამ საქმეში მოტივაცია დიდ როლს თამაშობს. თუ კონკრეტული მიზანი გაქვთ, რომლის გამოც იშრომებთ, ვერავინ შეგაჩერებთ.

სპორტს ბევრი ფარული სირთულე ახლავს. პირველ რიგში, ეს დაკავშირებულია იმასთან, რომ ადამიანი ისეთ ამოცანას ეჭიდება, რომელიც მის ძალებს აღემატება. გირჩევთ, მცირედით დაიწყოთ, კერძოდ სახლში პატარა ვარჯიშებით. Alltime.ge–ს რედაქცია გიზიარებთ სახლის ვარჯიშების წარმატებულ ნაკრებს ნებისმიერი შემთხვევისთვის!

როგორ დავიწყოთ ვარჯიში

ნებისმიერი ვარჯიშის დაწყებამდე კუნთები სწორად უნდა გაახუროთ. სავარჯიშო დარბაზში, როგორც წესი, 10-15 წუთს სარბენ ბილიკზე ან სავარჯიშო ველოსიპედზე ატარებენ. კლასიკურ გახურებას გირჩევთ, რომლითაც თავიდან ბოლომდე ყველა კუნთს გაახურებთ. გარდა ამისა, მთავარი ვარჯიშის დაწყებამდე ლახტზე ხტომა კარგია!

სახლში ვარჯიში მოსახერხებელია. ამისთვის სპეციალური აღჭურვილობა საჭირო არაა. კომფორტულად ჩაიცვით და შეიარაღდით ხალიჩით ან პლედით ზოგიერთი ვარჯიშისთვის, რომელიც დაწოლილ ან მჯდომარე პოზაში უნდა შეასრულოთ.

გთავაზობთ 5 კლასიკურ ვარჯიშს სახლში შესასრულებლად. რეგულარულად შეასრულეთ. მალე იგრძნობთ, რომ თქვენი სხეული გაძლიერდა, ხოლო განწყობა – გაუმჯობესდა!

ვარჯიშები სახლისთვის

1. ჩაჯდომები – ერთ–ერთი კლასიკური ვარჯიში, რომელიც თქვენს სპორტულ რუტინაში აუცილებლად უნდა იყოს. სხვადასხვანაირად შეგიძლიათ ჩაჯდეთ. მაგალითად, დამატებითი წონით ან მის გარეშე, ხელები თავზე ან თქვენ წინ. არ არსებობს ვარჯიში, რომელიც ჩაჯდომებს მარტივად ჩაანაცვლებს.

2. შემდეგ ვარჯიშს „ბურპი“ ჰქვია. ძალიან ეფექტურია, რადგან ჩაჯდომის, პლანკის, აზიდვის და ხტუნვის ელემენტებს შეიცავს. სწორად დადექით, ფეხები მხრების სიგანეზე გაშალეთ. ამოსუნთქვაზე მკვეთრად ჩაჯექით, ხელისგულები იატაკს დაადეთ. შემდეგ ნახევრად ნახტომში სხეულის წონა ხელებზე გადაიტანეთ, ამავდროულად ფეხები უკან გაწიეთ და პლანკის პოზა მიიღეთ.

კლასიკურ ვარიანტში ამ ეტაპზე ერთხელ აზიდვა უნდა გააკეთოთ. დამწყებისთვის ამის გაკეთება აუცილებელი არაა. უბრალოდ პრესის კუნთები დაჭიმეთ და ნახევრად ნახტომში ფეხები შიგნით შეწიეთ და ჩაჯდომის პოზას დაუბრუნდით. შემდეგ ზემოთ მკვეთრად ახტით, ხელები სხეულის გასწვრივ გაჭიმეთ.

3. კლასიკური აზიდვები სხვადასხვა გზით შეგიძლიათ შეასრულოთ. მუხლებზე აზიდვებს გთავაზობთ. ხელისგულები იატაკს დაადეთ, მხრების სიგანეზე ოდნავ ფართოდ გაშალეთ. მუხლები შეაერთეთ, ფეხები გადააჯვარედინეთ.  ტანის და თეძოს სწორი ხაზი შექმენით.

ჩასუნთქვაზე ხელები მოხარეთ, მხრები იატაკის პარალელურად დაუშვით. იდაყვები გვერდებზე უნდა იყოს შემობრუნებული. ყურადღებით იყავით, რომ წელი არ ჩამოიწიოს. ამოსუნთქვაზე იატაკიდან აიწიეთ, მკერდის და ხელის კუნთები დაჭიმეთ. საწყის პოზას დაუბრუნდით.

4. სახლში პრესის ვარჯიშებს გვერდს ვერ აუვლით. მის კლასიკურ ვარიანტს დამწყებიც მარტივად შეასრულებს. დაწექით, ფეხები მუხლებში მოხარეთ, ხელები თავის უკან დაიდეთ. ტერფები ხალიჩაზე დააფიქსირეთ.

ამოსუნთქვაზე ბეჭებით აწიეთ, ამასთან წელი იატაკზე მიბჯენილი უნდა იყოს. ვარჯიში ნელა, აუჩქარებლად შეასრულეთ.

5. ნებისმიერი ვარჯიშის ბოლოს პლანკის გაკეთებას გირჩევთ. ეფექტური ვარჯიში ძირითადი კუნთების გაძლიერებისკენაა მიმართული. საწყისი პოზა აზიდვების დროს სხეულის პოზის მსგავსია. იდაყვები სწორი კუთხით მოხრილი და მხრებთან ერთ ხაზზე უნდა იყოს.

ვიზუალურად სხეული ერთ სწორ ხაზს უნდა ქმნიდეს. მისი წონა იდაყვებზე ან ფეხის თითებზე უნდა გადაიტანოთ. ამ პოზაში რაც შეიძლება დიდხანს გაჩერდით. რაც უფრო ხშირად შეასრულებთ ამ ვარჯიშს, მით უფრო დიდხანს შეძლებთ მის შესრულებას.

ეს ვარჯიშების მხოლოდ მცირე ნაწილია, რომელიც სახლის პირობებში შეგიძლიათ შეასრულოთ. მეტი ივარჯიშეთ და ვარჯიშები ინტერნეტის დახმარებით შეისწავლეთ. გახსოვდეთ, რომ ნებისმიერ საქმეში მთავარია დაწყება!