იაპონელი მკურნალის 7 ვარჯიში შემუშავებული სპეციალურად ქალბატონის ორგანიზმისთვის. ამ ვარჯიშების მადლიერი დარჩებით

ცოტა ხნის წინ იაპონელი მკურნალის წიგნს „კაცუძო ნიშის ჯანმრთელობის სისტემას“ გადავაწყდი. ჩემი ყურადღება იმით მიიპყრო, რომ წიგნი ავტორის პირად გამოცდილებას ეფუძნებოდა. 20 წლის ასაკში იაპონელს სასიკვდილო დიაგნოზი დაუსვეს და მალე სიკვდილი უწინასწარმეტყველეს. თუმცა ის არ დანებდა და ცხოვრებისთვის ბრძოლა გააგრძელა. მან ეს მოახერხა, საკუთარი თავი განკურნა და დიდხანს და სრულყოფილად იცხოვრა.

მთელი ცხოვრება საკუთარი სისტემის შექმნას და სრულყოფას მიუძღვნა. მასში ძველი ბერძნული და ძველი ეგვიპტური მედიცინა, ტიბეტური და ჩინური პრაქტიკა, იოგა და ბევრი სხვა წყაროა მოცემულია. ნიშის ჯანმრთელობის სისტემა არა უბრალოდ ვარჯიშების ნაკრები და კვების სისტემა, არამედ მთელი ფილოსოფიაა.

იაპონური გამაჯანსაღებელი პრაქტიკით დიდი ხანია დაინტერესებული ვარ, მაგრამ კაცუძო ნიშის ფილოსოფიამ ყველაზე ძლიერ აღმაფრთოვანა. დასაწყისისთვის სცადეთ ვარჯიშების ნაკრები, რომელიც იაპონელმა ჯანმრთელობის და ორგანიზმის სამკურნალოდ შეიმუშავა. ქალებისთვის, რომლებიც მუდმივად სრულყოფილებისთვის მიისწრაფვიან, ის უბრალოდ შეუცვლელი იქნება.

ეს ვარჯიშები ადვილად შესასრულებელია, სხეულს მხნეობას და ენერგიას შემატებს, ასევე ჭარბ ცხიმს მოგაშორებთ და ლამაზ ფორმებს შეგძენთ. გარდა ამისა, სახსრებს გააძლიერებს და მარილების დაგროვებას შეაფერხებს. სცადეთ, დღეში მხოლოდ 15 წუთით ივარჯიშეთ და თქვენი სხეულის ცნობას ვერ შეძლებთ!

ვარჯიშების კომპლექსი ქალებისთვის

ვარჯიშისთვის შესაბამისი დრო შეარჩიეთ, როცა არსად გაქცევა არ მოგიწევთ. მთავარია – ვარჯიში ძალიან გვიან არ შეასრულოთ, რადგან ასე შეიძლება დღიური რიტმი დაარღვიოთ. სჯობს შეასრულოთ დილით, რომ მთელი დღე დადებითი ენერგიით და მხნეობით სავსე იყოთ. და კიდევ ერთი – ვარჯიშმა სიამოვნება უნდა მოგიტანოთ, მაშინ შედეგი არ დააყოვნებს.

მსუბუქი ტანსაცმელი ჩაიცვით, რომელიც ვარჯიშის შესრულებაში ხელს არ შეგიშლით. ცივი წყლით დაიბანეთ, გაიღიმეთ და პირველი ვარჯიშის გაკეთება დაიწყეთ.

ვარჯიში პირველი

ზურგზე დაწექით და მაქსიმალურად მოდუნდით. თანაბრად და ღრმად ისუნთქეთ. წარმოიდგინეთ, რომ მშვიდ და ლამაზ ადგილას იმყოფებით. ხელები გვერდებზე გაშალეთ. ფეხები შეაერთეთ და მუხლებში მოხარეთ. მუხლები მკერდისკენ მიწიეთ. ღრმად ჩაისუნთქეთ და მუხლები მარჯვნივ მოატრიალეთ, ეცადეთ იატაკს დაადოთ. თავი მარცხნივ მიატრიალეთ და ნელ-ნელა ამოისუნთქეთ.

კისრით იატაკს უნდა ეხებოდეთ, ხოლო მხრები და ხელები უმოძრაოდ უნდა იყოს. საწყის პოზას დაუბრუნდით, ღრმად ჩაისუნთქეთ და იგივე პროცედურა მეორე მხარეს შეასრულეთ. ვარჯიში დაასრულეთ. პირველ დღეს ვარჯიში 4-5-ჯერ შეასრულეთ, შემდეგ ნელ-ნელა 25-მდე გაზარდეთ.

ვარჯიში მეორე

ზურგზე დაწექით, ხელები სხეულის გასწვრივ გქონდეთ. ფეხები მუხლებში მოხარეთ და ერთმანეთისგან 30 სმ-ით დააშორეთ. ტერფებზე ძალა გადაიტანეთ. ღრმად ჩაისუნთქეთ და მუცლის კუნთები ასწიეთ. დუნდულები ზურგთან ერთად ზემოთ აწიეთ. ამ პოზაში რამდენიმე წამით გაჩერდით. ამოისუნთქეთ და ნელ-ნელა საწყის პოზას დაუბრუნდით. მოდუნდით და კიდევ ერთხელ შეასრულეთ. ვარჯიში სულ 5-ჯერ შეასრულეთ.

ვარჯიში მესამე

მუცელზე დაწექით და ერთი ლოყა იატაკს დაადეთ. ხელები სხეულის გასწვრივ, ქვემოთ გქონდეთ. ფეხები ერთმანეთისგან 15 სმ-ით დააშორეთ. ახლა დუნდულები დაჭიმეთ, თითის წვერები დაჭიმეთ და ერთი ფეხი აწიეთ. მეორე იატაკზე უმოძრაოდ გქონდეთ. ამ მდგომარეობაში რამდენიმე წამი გაჩერდით და ნელ-ნელა ფეხი იატაკს დაუბრუნეთ. იგივე მეორე ფეხზე გაიმეორეთ. თითოეულ ფეხზე 50-ჯერ შეასრულეთ.

ვარჯიში მეოთხე                   

იგივე პოზაში ხელები, თავი და ფეხები ზემოთ დაახლოებით 15 სმ-ით სწიეთ და ამ მდგომარეობაში რამდენიმე წამით გაჩერდით. ფეხები ზემოთ-ქვემოთ ამოძრავეთ, თითქოსდა ცურავთ. თითოეულ ფეხზე 25-50-ჯერ შეასრულეთ.

ვარჯიში მეხუთე

ოთხზე დადექით და ხელები მხრების გასწვრივ გქონდეთ. მარჯვენა ფეხი გამართეთ და იატაკიდან 30 სმ-ით ასწიეთ. 25-ჯერ ზემოთ-ქვემოთ ამოძრავეთ. ამის შემდეგ საწყის პოზას დაუბრუნდით და იგივე მეორე ფეხზე გაიმეორეთ.

ვარჯიში მეექვსე

იგივე პოზა შეინარჩუნეთ, თავი ქვემოთ დასწიეთ, წელი ზემოთ ასწიეთ. მარჯვენა ფეხის მუხლი ისე ასწიეთ, რომ შუბლს შეეხოთ. შემდეგ ფეხი გამართეთ და ზემოთ აწიეთ, ამასთან თავიც აწიეთ. ვარჯიში თითოეულ ფეხზე 10-ჯერ შეასრულეთ.

ვარჯიში მეშვიდე

მუხლებზე დადექით, კორპუსი ვერტიკალურად გქონდეთ, ხელები სხეულის გასწვრივ. ზურგი სწორად დაიჭირეთ, ოდნავ უკან გადაიხარეთ და ამ პოზაში რამდენიმე წამით გაჩერდით. საწყის პოზას დაუბრუნდით და ვარჯიში კიდევ 5-ჯერ შეასრულეთ.

ნელა, ძალდატანების გარეშე – სწორედ ასე უნდა შეასრულოთ ეს ვარჯიშები. ვარჯიშის შემდეგ ნელა წამოდექით და ოთახებში გაიარეთ, სუნთქვა დაამშვიდეთ. სასიამოვნოზე იფიქრეთ და ამ ფიქრებით გაიხარეთ. თუ კომპლექსს მხოლოდ ვარჯიშების ნაკრებად არ განიხილავთ და მასზე, როგორც მოდუნების საშუალებაზე იფიქრებთ, ის მედიტაციის მეთოდი გახდება.

ამ ვიდეოში კაცუძო ნიშის ჯანმრთელობის წესებზე ბევრად უფრო ბევრს გაიგებთ.