ჯანმრთელობის კალენდარი: 12 ცვლილება, რომლისთვისაც 1 წელში მადლობას გადაიხდით

ყველაზე დიდი მიღწევები მცირე ცვლილებებით და მარტივი ჩვევებით მიიღება. თუ ყოველდღე ახალ სასარგებლო ჩვევაზე 15 წუთს დახარჯავთ, უკვე ერთ წელში ნამდვილად შთამბეჭდავ შედეგს მიიღებთ. განსაკუთრებით სასიამოვნოა, რო, ამას თავისთავად, თითქმის შეუმჩნევლად მიაღწევთ. Alltime.ge–ს რედაქცია გთავაზობთ პატარა ექსპერიმენტი ჩაატაროთ და ამ წლის ყოველ თვეს თქვენს ცხოვრებაში ერთი პატარა ცვლილება შეიტანოთ. სრული პასუხისმგებლობით ვაცხადებთ: 12 თვეში უფრო ენერგიული და ჯანმრთელი გახდებით.

თვე 1: ყოველ კვირას 15 წუთით ადრე დაწექით

როდის დავიძინოთ თუ არა ახლა? როდის დავიწყოთ ძილის ექსპერიმენტი თუ არა დასვენებების დროს? ძილის მოწესრიგება ჯანმრთელობისთვის საუკეთესო რამაა, რაც შეგიძლიათ გააკეთოთ. სრულყოფილი ღამის დასვენება გულ–სისხლძარღვთა სისტემის მუშაობას არეგულირებს, ნივთიერებათა ცვლას აჩქარებს, სტრესს ებრძვის, სიბერეს აფერხებს, სიმსივნისგანაც დაგიცავთ. ადრე დასაწოლად მთელი თავისუფალი საათის პოვნა რთულია, მაგრამ ყოველ კვირას 15 წუთით ადრე დაწოლა (მაგალითად, ღამით ინტერნეტ სერფინგის ან წიგნის რამდენიმე გვერდის სანაცვლოდ) საკმარისია, რომ ერთ თვეში თითქმის 1 საათს მიაღწიოთ. თავს გაცილებით უკეთ იგრძნობთ.

თვე 2: მზისგან დამცავი კრემის გამოყენება

დერმატოლოგები გაფრთხილებთ: უმეტესობა ჩვენგანი კანს მზისგან სათანადოდ არ იცავს. კანის სიმსივნის ეფექტური პრევენცია ულტრაიისფერი სხივებისგან დამცავი პროდუქტების გამოყენებას გულისხმობს. კრემი მინიმუმ 30 (უკეთესია 50) ინდექსით შეარჩიეთ და ყოველდღე გამოიყენეთ, თუნდაც გარეთ ღრუბლიანი ამინდი იყოს და სანაპიროზე ან ოფისში წასვლას არ აპირებდეთ. არ დაგავიწყდეთ, რომ დაცვა სკალპს, ხელს და თმასაც სჭირდება.

თვე 3: თქვენი გული დაიცავით და გააძლიერეთ

დღემდე გულის დაავადებები სიკვდილიანობის უმთავრეს მიზეზად რჩება. ექიმები არ იღლებიან შეხსენებით: ცხოვრების წესი გულ–სისხლძარღვთა დაავადებების განვითარების რისკზე მნიშვნელოვან გავლენას ახდენს. ფეხით სიარული ერთ–ერთი ყველაზე ეფექტური მეთოდია. მხოლოდ 15-30 წუთი კარდიოვარჯიში რისკს მნიშვნელოვნად ამცირებს. დილით ვარჯიშების პატარა ნაკრები, საღამოს სამსახურის შემდეგ ფეხით სიარული (რომელიც რთული სამუშაო დღის შემდეგ განტვირთვაშიც დაგეხმარებათ), ლიფტის ნაცვლად კიბეებით ასვლა – ასეთი პატარა ცვლილებები თქვენი გულის ჯანმრთელობის მხარდაჭერაში დაგეხმარებათ. წელიწადში ერთხელ გული აუცილებლად გამოიკვლიეთ – მხოლოდ იმისთვის, რომ დარწმუნდეთ, რომ კვლავ კარგად მუშაობს.

თვე 4: მხედველობაზე იზრუნეთ

დაბრმავების ან მხედველობის ნაწილობრივ დაქვეითების შიში ერთ–ერთი ყველაზე გავრცელებულია, მაგრამ უმეტესობა ჩვენგანი თვალის დასაცავად არაფერს აკეთებს. მათ შორის, ყველაზე მარტივს – მზისგან თვალების დაცვა. გაზაფხულზე მზე ნამდვილად კაშკაშა ხდება. დროა ახალი სასარგებლო ჩვევა შეიძინოთ – მზისგან დამცავი სათვალე ატარეთ. წვრილმანია? ასე არა მხოლოდ თვალს (არ დაგავიწყდეთ, რომ მელანომა არა მხოლოდ კანში, არამედ თვალშიც ვითარდება), არამედ თვალის გარშემო ნაზ კანსაც დაიცავთ.

თვე 5: მეტი ხილი და ბოსტნეული მიირთვით

5 ულუფა ახალი ბოსტნეული და ხილი ყოველდღიური მინიმუმია, რომელიც კუჭ–ნაწლავის ტრაქტის ჯანმრთელობის შესანარჩუნებლად საჭიროა. ყოველი კვებისას თითო ხილის ან ბოსტნეულის დამატებით დაიწყეთ. ეს რთული არაა, ხოლო შედეგს ძალიან მალე შეამჩნევთ.

თვე 6: გრიპის აცრა გაიკეთეთ

აცრისთვის საუკეთესო დროა. არ დაგავიწყდეთ, რომ მინიმუმ 2 კვირაა საჭირო, რომ იმუნიტეტი სრულად გაძლიერდეს. სჯობს აცრა რაც შეიძლება ადრე გაიკეთოთ და გრიპს შეიარაღებული შეხვდეთ.

თვე 7: ნაკლები შაქარი მიირთვით

თუ შაქრიან ყავას ან ჩაის სვამთ, დაიწყეთ იმით, რომ დღეში თითო ფინჯანს 50%–ით ნაკლები შაქარი დაუმატოთ ან მის ნაცვლად თაფლი გამოიყენოთ. უმარტივესი მეთოდი: 1 დღიური დესერტი ჩირის ულუფით ჩაანაცვლეთ. აირჩიეთ ისეთი ჩირი, რომელიც შაქრის სიროფის გარეშე მზადდება. ეს წვრილმანია და დიდ ძალისხმევას არ მოითხოვს – მყისიერ შედეგს მიიღებთ.

თვე 8: პატარა ზომის ჭურჭლიდან შეჭამეთ

ძალიან ხშირად საჭიროზე 15-20%–ით მეტს მივირთმევთ. ჩქარი ჭამისას დანაყრების სიგნალს ვერ ვამჩნევთ. ლოგიკური რჩევის გარდა, რომ ნელა მიირთვათ და ჭამის დროს სხვა რამეზე არ გადაერთოდ, კიდევ ერთ ხრიკს გიზიარებთ. პატარა ზომის ჭურჭელი შეიძინეთ: პატარა ულუფა ვიზუალურად საკმარისი გამოჩნდება და ზუსტად იმდენს მიირთმევთ, რამდენიც გჭირდებათ და თან შიმშილს არ იგრძნობთ.

თვე 9: სამედიცინო გამოკვლევა ჩაიტარეთ

რამდენიმე დღე თქვენი ჯანმრთელობის შემოწმებას დაუთმეთ. სისხლის და შარდის ანალიზები ჩააბარეთ, მნიშვნელოვან ორგანოებზე (გული, ფარისებრი ჯირკვალი, მუცლის ღრუს ორგანოები და მენჯის ორგანოები) ექოსკოპია გადაიღეთ, გინეკოლოგთან და მამოლოგთან, ასევე სტომატოლოგთან და ოფთალმოლოგთან პროფილაქტიკური გამოკვლევა ჩაიტარეთ.

თვე 10: ნახშირწყლების რაოდენობა შეამცირეთ

შეამცირეთ არა ნებისმიერი, არამედ მხოლოდ „ცარიელი“ ნახშირწყლების რაოდენობა. ნახშირწყლები ორგანიზმს აუცილებლად სჭირდება და მნიშვნელოვანია, რომ ბოსტნეულიდან და მარცვლეულიდან საკმარისი რაოდენობით მიიღოთ. თეთრი ბრინჯი ყავისფერით ჩაანაცვლეთ, ჩვეული გარნირის ნაცვლად პარკოსანი მიირთვით, საუზმეზე შვრია ხშირად მიირთვით. ასე ჯანმრთელობაზე იზრუნებთ და სხეულის ფორმებს გააუმჯობესებთ.

თვე 11: დღეში 5 წუთი მედიტაციას დაუთმეთ

სტრესი ჩვენი მუდმივი თანამგზავრია, რომელიც ჯანმრთელობას ჩუმად ანადგურებს. მედიტაცია უმარტივესი და ეფექტური მეთოდია ყოველდღიურ სტრესთან საბრძოლველად, მის შედეგებს ამცირებს ან საერთოდ აქრობს. კვლევებით დადასტურებულია, რომ მედიტაცია ბედნიერების დონეს ზრდის – ეს კი წლის ყველაზე სევდიან თვეს აუცილებელია.

 თვე 12: დღეში ერთ ბოკალზე ნაკლები ღვინო დალიეთ

კარანტინი – სტრესი + მარტოობა + ჭარბი დრო, რომელიც რაღაცით უნდა შეავსოთ, სახიფათო კომბინაციაა. ერთი შეხედვით ეს ყველაფერი უვნებელია, მაგრამ სინამდვილეში თითოეული ულუფა ალკოჰოლი სხვადასხვა დაავადებების განვითარების რისკს ზრდის, თან ნივთიერებათა ცვლას არღვევს და ძილზე ცუდ გავლენას ახდენს. ალკოჰოლზე სრულად უარის თქმას არ გირჩევთ, მაგრამ ერთი ულუფით შემცირება სცადეთ. ორგანიზმი ნამდვილად „მადლობას“ გეტყვით!